Istwêre d’in « bén râde » èt d’in ravikâdje…

Quand èl Sint-Roch èst woute, nos ‘stons scrands bén seûr mins nos ‘stons ètou ène miyète disbôtchîs, tèl’mint les djoûs avou tèrtous leûs bias momints sont râde d-alès… On s’èr’trouve èl lindi à-l’rintréye su-l’place d’èl vile-wôte an pinsant: « nos ‘stons d’djà au d’bout dès trwès djoûs dèl mârche… ».
Ène mitan d’no keûr èst binôje avou lès bèles souv’nances dèl Sint-Roch qu’on vént d’vikî sins r’lache dins l’bouneûr èyèt l’ôte mitan d-a gros paç’qui djustèmint èl Sint-Roch è-st-èvoye dins lès souv’nances…
Adon, i nos chène qu’an pinsant d’djà à l’Sint-Roch chûvante, on r’mèt ène bètchîye di solia dins l’mitan d’no keûr qu’a gros…
Insi, quand nos dîjons « è v’la co yeûne dè fète », nos n’p’lons nén nos-èspétchî d’èr’wétî d’djà pus lon, à l’anéye qui vént, avou lès mots d’invîye èt d’èspwêr, les fameûs mots qui nos rasseûr’nut: « bén râde Sint-Roch ! ». Cès mots-là sont simpes mins tèl’mint foûrts dins nos pinséyes: is-aloy’nut, is-atach’nut ène Sint-Roch avou l’chûvante…

Èl lindi au gnût dèl Sint-Roch 2019, come toutes lès anéyes dè d’vant, nos d-avons dit aus camarâdes o bén nos d-avons pinsè seûl’mint didins nos-autes: « bén râde Sint-Roch ! »…
Mins, c’ « bén râde » -là on s’è souvéra lon.mins…C’è-st-in « bén râde » qu’a mètu l’timps, èl timps qu’èl têre fèye trwès toûrs alintoûr du solia, adon qu’nos-ôtes nos ratindines di fé no toûr avou l’pourcèssion.
C’è-st-in « bén râde » qui nos-a djouwè cénq’ lignes, on direût co mia qu’c’è-st-in prom’teû d’bondjoû…, in prom’teû dès bons djoûs d’Sint-Roch qui dwèv’nut nos r’vènî chaque anéye…
Mins, i-n’faut nén s’è prinde à li, c’n’èst nén d’ès’ fôte. Ès’ vwèyâdje a ‘stî long à côse dès rûjes su s’voye !
Èl « bén râde » a ‘stî ralinti mins i-n’s’a nén djokè èyèt i va d-alér au d’bout du tch’mwin ; vos savèz bén pouqwè ? Dispûs èl preumî manque an 2020, tèrtous lès marcheûs d’Sint-Roch, tèrtous lès thudiniens qui wèy’nut voltî leû mârche, n’ont jamés pinsè à bachî les bras; is d-ont toudis v’lu crwêre dins leû « bén râde » !

Ène bèle trawèye dè bleû stwèlî dins lès nuwâdjes è-st-an route à nos-èvoyî les spites d’ène leumiêre qu’èst pus r’lûjante, pus asbleuwichante qu’ène leumiêre d’espwêr, c’è-st-ène leumiêre di ravikâdje, èl ravikâdje dèl mârche !
Adon, nosse « bén râde » di 2019 èst binôje, i nos-a ramwin.nè èl leumiêre dèl mârche èyèt c’è-st-insi qu’i va fini s’n-ouvrâdje… I l’èsteût timps !
Nos d-avons dandjî d’èr’sintî èl ravikâdje du feû dèl mârche didins nos-ôtes paç’qui l’mârche c’è-st-in boukèt d’nos-ôtes…
Nos d-avons dandjî qu’sès flames fèy’nut fèrtiyî nos pinséyes, r’lûj’nut woûrs dè nos-îs, mèt’nut dèl jwè dins no keûr èyèt dès frumûj’mints dins no boudène !
Èyèt, nos d-avons dandjî di nos-èr’trouvér tèrtous èchène pou kèrtchî no keûr dèl tchaleûr èyèt dèl leumiêre dès djins…
Nos d-avons dandjî di tout çoula ètou pou kèrtchî no mémwêre avou dès bèles souv’nances pou lès fayès djoûs…

Bén seûr, èl lindi au gnût dèl Sint-Roch 2022, quand nos dîrons « bén râde Sint-Roch », nos n’pourons nén nos-èspétchî d’pinsér qu’in « bén râde » n’èst nén toudis t’t-ossi râde qu’on voureût, èyèt qu’i fét s’possîbe…
Mins, d’vant c’momint-là, i faut d-è profitér du ré d’solia qui vént lumér o-d’zeûs d’no tièsse, o-d’zeûs d’no bia bèf’wrè, pou fé ravikî nosse mârche Sint-Roch !
Èl sam’di au gnût, dji wè d’djà èl grand sèrpint d’leumiêre sè tôrtiyant intrè lès p’titès rûwes, lès rampârts èt lès gripètes, èl sèrpint dès djins qui pôrt’nut leû falot d’feû pou drouvu èl fièsse di Sint-Roch dins-ène leumiêre qui rachène èyèt qui s’r’a, c’t-anéye, ène leumiêre di ravikâdje !

Freddy Walbrecq, Avril 2022.